Bit toon Studeern

Nu ward dat maal 'n anner web-siet, een up Platt.
Miene olle web-siet is nich mehr güllig,  bünn jo nu Rentner, heff keen Kontor mehr.
Liekers will ik avers in't Net blieven, gifft jo veel Lüüd, de mi kennt un de mi kennliernt; steit jo ook allns up de Breefpapeers un Visitenkoorts.
Un Platt kann ick good lieeden, heff ik ass lütt Jung all höört, too huus fun Vaddern,  up'n Buu  in miene Leertiet, laaterhin ass Architekt up miene Buustelln un miene Frünschaft mit’n Slutuper Fischermann.

Nu will ick avers wiesen, woröver ik mitschnacken kann, watt fun mi buut worrn is,
watt ik  sünst maakt heff, mi upfulln is, fotogafeert und teikent haar.
Dat heit, too ierst wat 'n beeten över mi:
Üm de Kinner- un Schooltiet schnack ik lever nich, mööt fun  de Overschool afgoon, käm up'n Buu inne Muurerlier. Bünn avers blang bi inne Aavenschool gaan, wull jo studeeren, nich Muurmann blieven.
Heff 'n Tiet lang as Muurmann arbeid, mööt ook een Joor too de Soldatens.

Negenteinhunnerttweunsössti heff ik mi toon Studeeren in de Staatsbuuschool Lübeck inschreven.
Mien beeten upspoortes Geld för't Leeven, Studeeren, Togföören güng too Enn, heff mi bi de Överste Postdirekschoon in Hamborch bewarvt, kreeg naa'n lütt Examen een Stipendium. Doorför mööt ik mi verplichen, mien Studeeren in kötteste Tiet aftoholen, de Examens to bestaan un fief Joor as Buuinjenör bi de Post too arbeiden.

Noog Geld wier dat liekers nich (Fruu un twe Kinners), mööt mi wat doortoo verdeen; bün morns Klock halbi veer upstaan, toon Backer-Naaver gaan, in sien Auto wull sössti, söbenti Rundstückbüddel naa Adressn packt un as de Düvel krüz un kwer dörch Osloh föört, de Büddels anne Huusdöörn hängt.
Annerthalf Stünn un messnatt sweet weller toohuus mi wuschen, ümtrocken, fröstückt (Deputatrundstück) un af toon Toog, de Buuschool füng Klocken ach an.

Nu too't Studeeren.
Anners, as ik dat veel laterhin kennliernt heff (vertell ik an anner Steel) wier dat as'n rein Schoolbedrief.
Wi wiern keene Studenten, wiern Studeernde, uns Schoolmesters nok nich Professers, dat wörn Dozentens. Un de Höörsälen heiten Semesterruums. Dat geef ook Klassenbooks, wiers nich door, eller hess di schlech upföört, de Huusupgaven nich maakt, würrs inschreven.
Dat wiern ook keen Vörleesung, nee, stramm Ünnerich. Mitmooken kunnst di nich utsöken, as inne School würst upraapen, Huusabeiden würn naaseen. Klausurn geef dat 'n Huupen.

Kunnst avers ook wat liern, na  dat denn in dien Kopp ringüng.  Lich wier dat nich, keen Wunner, dat de Klass, dat Semester jümmers lütter würr.
In't ierste Semester würrn wi över vierti Lüüd, na't drütte, na't Twüschenexam, knapp dörti, dat Hauptexam na't sösste Semester bestaan un as Diplom-Injenör för Hochbuu hebbt veeruntwinti.De iersten anderthalf Joor wör so 'ne Oort Grundutbillung, wurr di allns wiest, wat mit Buueri to doon hett, Buukonschtrukschon, Buuschemie, Buumateriaal, Buugeschich. Toosomenhäng fun  Lastverdeelung, Buustoff un Buuwies.
Avers ook, as vormang Plads man inne Huus brugt, över Afstänn in, un ook fun de Huus. Doorför un doorto müsst denn ook teiken un schrieven. Dat müsst liern, de richtge Schriff, eer Gröten, de Linjen eern Srichdicken, is jo allns noormt.
Een Fack geef dat, door sünd veel nich mit trechkommn, dat wier 'Darstellende Geometrie'; reeken und ruumli förstelln müss kunnen, om toon Bispeel Perschpektivs too konstriern.

In't feerte Semester güng dat mit de Plaaneri los.
Dree Slags geef dat:
Denn Semesterentwurf, kunnst di uutsöken, wat du plaanen wullt, harst 'n half Joor Tiet.
De Huusupgaaf, würr di segt, wat du inne Week teiken schullst´.
De Schnellentwurf, müss fix inne School na Förgaaf in twee, dree Stünn wat utarbeidn.
Dooran, avers ook an de Fäcker Statik un Stahlbeton sünd Lüüd scheitert un afgoon. Müsst bereken un naawiesen künn, as wi drachti diene Pielers, Balkens ut Isen, Holt elles Beton sünd, Momentverlöbs teiken. De Klausuren dooröber wiern nich graad beleeft.
Toon Reeken geeft dat avers 'n Huupen mier: As wofeel Regenwater up't Dak un de Hoff füll, Schietwater inne Gebüüd anfallt, as wi groot de Inlööp un Roors ween mütt.
Reekenmaschins geeft nich, müss allns in Kopp un mit de Hanns maken, in de letzten Semesters dröfts avers den Reekenschiever bruuken.