Kontor up’n Flughooben

Achensöbenti kunn ik up'n Flughooben, blang bi de Hangars, innen Flachbuu mi 'n Kontor uutbuun un inrichen. Twe Ruums toon abeiden, een lütten as Achiv, een gaanz grooten de iersten Joor toon Siefdruggen (laaterhin würr dat toon Grootbüro), een grötteren as Laboratorium för de Siefdruggerie.

Ik wull jo all jümmers mier uut de Knipserie maaken, heff mi dörch Affkieken bien Buuschillermaaker dat bibröcht, as wi man de Upnaams rastert, de Sief beschicht un druggfaarti maakt, dat raakeln un de rechten Farven för de unnerscheedlichen Ünnergrünn bruukt.

In denn grooten Ruum mit denn bannig grooten Disch un een Brennooben heff ik ook mit 'ner Frünn'n, sei wier Schoolmeestersch, Ünnerich int Töppern, Porzlaanmaaln un't Brenn'n geeven.

Dat güng so lang dat güng, alleen harr ik keen Tied mier, as de Schoolmeestersch uphöört is. Ik harr jo ook nooch too doon. Plaant un buut heff ik för de LHG (Lübsche Hooben Sellschap), den HBV (Hooben Betrievs Vereen) un de Firma Lehmann.

Un de Fleegerie güng mi nich ut't Kopp.

Wenn ik denn ok nich denn Schien för de Seilfleegers too Enn maaken kunn, dat güng jo jümmers an de Weekenns, hett de Fru Stopp seggt, sei wull nich ook nok Sünnavens un Sünndags mit de Gören aleen ween, bünn ik sass nok ierst too't Fleegen un laterhin to'n Fleeger komm'.

De Vereen harr ook een Motorseilfleeger, dröffs avers keen Lüüt utbillen. Denn Papierkriech mit de Behöörns un Ministeriens heff ik dürchstaan, door kunn ik unner de Week dat Fleegen för de Motorseilfleegers liern.

Leeg wier dat man, dat de Vereen nur een Motorseilfleeger harr. Harr ik Tied, wier de Maschien besett eller dat Weeder wier slech. Good twe Joor heff ik mi dooröber argert, heff ik denn blang bi de Abeid denn Schien för'n richtgen Fleeger un dat Funktüchnis in Inglisch (dat Dütsche harr ik all) maakt un mi Negenteinhunnerttweunachti een ollen Fleeger köfft. Ne Pützer-Elster.

Dat wier di soon Fleeger, jümmershin de ierste, up den na'n Kriech bi de Bunnesweer de Pilotens utbillen wurrn. Spannwied döttein, Längs söben Meters, een Twesidder.

Dat Ding too föörn musst uppassen, lenken müsst ass'n Schuufkoor, inne Mitt fun de Sidds wier soon Stang, de müsst bien Linksrumföörn naa rechts, biet Rechtsrumföörn naa links trekken, dröffst up keen Fall dat Faststelln bien Start vergeeten. Wierst avers iersmaal inne Luff, wier dat 'n ganz sinniges Fleegen, kreegs avers jed Thermik mit.

Dat Lann' wier denn weller 'n beeten figgeliensch, müsst egentli dree Hänn hebben, een för denn Stüürknübbel, een fört Gas un een för de Störklabbs, de Griff doorför seet ünner de Deck, müss naa baaben recken. Denn Fleeger harr ik bit Negenteinhunnertsössunachti.

Nu avers trüch toon Veerdag.

Buut heff ik in de Tied för Lehmann (Ansich ünnen, süüt nu ook anners uut) un för de Lübsche Hoobensellschapp.

Un, heff ik mi inne Studeertied ook nich drömmt, kreeg ik dog 'n Lierupdrag fun de Buuschool (FH), wier door dree Semesters ass Gassdozent för Buukonschruktschon un Buustoffkun'. För 'n poor swatte Studentens geef ik Naahölpstunns bi mi int Kontor, een doorfun is in Lübeck bleeven, hett sik laaterhin as Statiker selfstännig maakt.

Too de Tied hebbt wi uns denn iersten Compschuter anschafft, Programms, Drugger, Plodder un wat sünst nok toohöört. Wier 'n düürn Kraam, so anne föffteindusend Mark hett dat kost. Dat Abeiden mit de Schrief- un Teikenprogramms hebbt wi un sülben bibröcht.Um disse Uutrüssung betoolen too künn, heff ik min Fleeger verköfft, hett weidoon.

Oon Fleeger güng dat man nur een Joor, Negenunachenti harr ik den nästen, ook weller 'n Twesidder, ne Bölkow Junior.

Disse Fleeger wier lütter, Spannwied ach, Längs ünner söss Meters; avers inne Luff sneller as de Heister (Pützer Elster) un ünnen lichter too föören. Fleeg ik bit Negenteinhunnertfiefunnegenti.