Nu weller too mien Alldag

Nu weller too mien Alldag, un dat wier jo man jümmers Abeid.

In Twedusindunsöben güng dat mit de Baggerie för de Kai los. Achuntwintidusind Kubikmeters mööt för de Firma Lehmann ut de Trav ruthaalt warrn, um dat Föörwater för de grooten Schips deep nooch to mooken. Wier ‘n figelinsche Abeid. Ierst wörr ne groote plastert Flaag tiert, ringsüm een twe Meter hoche Wall upschütt, de Wall mit Gummimatts waterdich afdeckt, de Hoffinlöps an ne Sickergruuf anschlooten.

De Baggerschip hebbt de Schiet ut de Trav hoolt, in blangbi liggende Schuutens schmeten, ut de Schutens käm dat denn up de tierte Flaag. Dat Sickerwater ut de Sickergruuf würr in groote Filtertunns pumpt, dat kunn denn as reinet Water in’t Hoffsiel afföört warrn.

As naa ‘n poor Weeken de Mutt uutdröögt wier, wörr de mit LKWs to Sünnerdeponie bröcht.

Twedusidunneegen heff ik dat Kontorhuus fun de förmaalige Flender-Warft afreeten, Hallns utrüümt, Inbuuten för de Fährschipreederien un den Toll maaken, denn niegen Anlegger för RoRo-Schips buun laaten.

Blang bi bünn ik anfungen mit dat ‚Planfeststellungsverfahren‘ för denn Lehmannkai Dre, de anner Aart fun’n Buuandrag.

As dat bi all miene Planungs för de Anleggerniebuuten wier, kunn man ni toon Buuamt fun’ne Stadt gaan un door ‘n Andrag stelln. Dat güng allns mit Naawies för Umwelt-, Natur- un Larmschutz över de Ministers in Kiel. Wat wier dat een Huupen Papierkrieg.

De olle Hochoobengelänn güng / geiht över dre Etasch, de böberste, good twölf, döttein Meters över NN, wo maal de Hochoobens stünn, geef dat nok den Köölturm (heff ik ook all afreeten), de middelst Etasch, wiern frööer de Kaalhalden, söss Meters över NN un ünnen de Kaiflags, door hebbt de Kaalschips anlegt.

Un nu schull door een richtigen Hooben uut warrn, ünnen mit de sanierte olle un niege Kaimuur, een lang Anleggersteeg för groote Schips, doorto niege Gleisanlaags.

Uppe middelst Etasch plastert Affstellflaags för Import- un Exportautos un ne groote Lagerhall; Baaben, dat ganze intüünt, Affstellflaags för Trailers un Upleggers, trennt naa In- un Utlann, Remies för de Hoobenföörtüchs, Kontor- und Kontrollbuuwarks.

De Plaanung heff ik dörchkreegen, dat geef denn amtlichen ‚Planfeststellungsbeschluss‘.

Nur uut de Buuerie wurr nix, de Gschäft güng trüüch, allns wüür up Iis legt, un door ligt dat hüüt nok.