Twedusind un laater, anner Kontor un anner Waanung

Twetusind wörr ‘n Joor mit twe groote Umtüüg, fun de Meckelnborger Straat tweundöttig na de Meckelborger Straat feer toon Waan’n un fun de Fabrikstraat eenunviertig na’n Haler Ort veeruntwintig mit dat Kontor.

Dat Huus inne Meckelborger Straat hebbt wi pacht, dat innen Haler Ort kööbt.

De M-Feer wier scheuner un mit good hunnertfiefunsösstig Quadratmeters grötter as de Tweundöttig, dat Grunstück, mit twe Garajs, een för mien Frus Auto, een för mien Waag, güng bit anne Wiek, höört twor nich allns to dat Huus, denn ünnersten Goorn un de Wisch daför höörten toon Naarbor, dröften wi avers mit bruken.

Dat Huus leeg jo good söss Meters höcher as de Wiek, un so harrn man een dullen Utblick över dat Gröön un dat Water, de Trav, bit toon Lehmannkai Dree up de anner Siet fun de Wiek.

Up de Wiesch kunnst veel sein, Wildswien, Foss, Rees mit Kitten un an Vaagels allns wat dat so gifft.

Jo, un dat Huus in denn Haler Ort würr nu uns Kontorhuus.

Updeelt heff ik de good hunnert Quadratmeters so, dat ganz ünn’n de Technik (Server, Druggers, Fax, Sniedmaschien), Abeidssteel för twe Lüüd, een lütt Teeköök, een Tolett un ünner de Trepp wat toon Afstelln wier. Inne Mitt, een Etaasch höcher, anne Straaten- un anne Goornsiet je een Kontorruum (de anne Goornsiet wier mien, kunnst de Wiek un de Trav bit toon Stülper Huu sein), door mang nok een Tolett. Ganz baaben wier de Konfrenzruum, ook mit Utsicht över’t Water.

To doon harr ik veel, dne groote Straatenbuufirma  kreeg een ganz niegen Bedriefshoff, dat heit een groot Kontorhuus, ne Remies för de Straatenbuumaschiens, ne Hall för’t Gerät un ne bannig groote plastert Flaag toon Affstelln fun de LKWs.

Dat Kontorhuus würr in Dänmark förfartig, in Lübeck toosommenbuut, harr ik nich nur hier de Buuleitung, ne, bünn poormaal na Dänmark föört, de Abeid door to kontroleern.

Mit de Förfartigung fun Kontor- un Waanhüüs heff ik goode Insichen kreegen, güng meist fixer un wier ook billiger as dat Buun Steen up Steen.

Un so heff ik mit sweedsch Buufirm (Åseda A/B in Åseda) Waanhuus, mit dänsch (ut Høring) un dütsche (Cadolto, uut Nürnbarg) Kontorhüüs buut.

De däänschen un dütschen Fartigdeele käm as Ruumzelln, wiern binn’n fix un fartig mit allns, Lüchten, Kabelns, Footbaadens, de Wänn fliest, un, un, un. Up de Buusteel würrn sei denn mit’n Kraanwaag hinstellt, de Anschlüss verbunn’n.

Up de Aart un Wies heff ik, naa ik denn niegen Anlegger, Hooben Lehmannkai Een trech harr, för de Riga-Fäär een kompletten Terminal buut.

Nu een beeten wat anners, hett letz Enn avers ook wat mit mine Abeid too doon:

Denn Motorseiler harr ik jo förn Joorstied verköpen kunn, wull avers weller een Schip hebben. Kreeg denn ook Twedusinddre de „Signe“, en Motorschip, dat würr de nästen ach Joor mien Abeidsschip.

Door harr ik allns an Bord, Steel toon Waanen, Slaapen un Abeiden, lütt Pantry un Tolett.