Weller selfstänni un wat över dat Fleegen

Negenteinhunnerttachensöbenti wier't so wiet, weller selvstänni. Tooierst  nok fun too Huus, de Marlistraat, uut.
Too de Tiet harr ik denn soo'n Slötelerlevnis, wier too de Seilfleegers na Blankensee föört, mit'n Fleeglierer in Tweesidder 'ne goode Stünn över Lübeck seilt. Hett mi soo gefulln, dat ik glieks in'n Aero Club intreden bünn, um dat Fleegen to liern.

Un so käm denn een toon annern. Too de Uutbillung höörte ook een Huupen teoretschen Kraam, ünner annen ook, ass wi man inne Fleegerie sabbelt, dorföör geef dat Unnerich  för't Funksprechtüchnis.  Ünnerich geef Herr (Fritze) Hammesfahr, hei höörte too de Lüüd, de ass Jung Kierls glieks naa de School inne Weermach güng, toon Piloten utbült wurrn un na'n Krieg nix anners kunn ass Fleegen.  Dat is denn ook sien Abeid worrn, hett anner Lüüd dat Fleegen fun de Propellerfleegers bibröcht, Unnerrich för't Funken geven, hett mit Banners för Werbung un mit sine Piper för Luffbildupnaamen flaagen.

Un dat mit de Knipserie, dat wier jo wat för mi

Ik heff jo all förheer feel fotografeert, miene Buusteeln, för't Lannesbuuamt de Kaserns un för't Straatenbuuamt de Straatens, an de buut waarn schull. De Straatenknipserie wier ook 'ne feine Saak, een halves Fleegen. Too drütt, de Foorer, en Techniker fun't Amt un ik, sünd wi mit'n Brüchwoogen fun Kurv to Kurv föört, de Waag würr fasstellt, de Foorer hett mi denn inne Kurf hoch föört, so anne tein Meters, ik heff denn dat Straatenstück bit to de nächst Kurv upnaam, de fun't Amt hett den Stannpunkt funne Waag un mien Knipsrichtung innen Straatenbuuplaan indragen.
Fun Hamborch bit Feemarn hebbt wie Straatens fotografeert, eenmaal för Buubegünn, doornaa fun die glieken Steeln, een Joor naa't Buun, wenn de Planten anwussen wiern.

Jo, un nu käm nok dat Fotografeern uut de Luff doortoo. Fun Negenteinhunnertsöbenunsöbenti bit Negenteinhunnertnegenti heff ik mi een, twee mol fun miene anne Arbeid frienaam un mit Fritze Hammesfahr un siene PA 18  krüüz un kweer över de 'Wessdütschen' Lann flaagen, meist üm för 'ne Möllner Firma Kläranlaags to fotografeern.
De Möllner harrn sik besünnerse Anlaags för dat Reinigen fun Schietwaater fun Dörpsgemein'n infallen laaten. Passten sik inne Lannschaff in, seen fun baaben, ut de Luff, ut ass Karbendieks.

Ik heff ut Mölln ne Liss mit de Dörpers kreegen, in Straatenkoorts de (Lufflinen-)Tuur inmaalt, de Miles utreekent, ankrüzt, wo de nästen Lanneplätz sünd. Sunne Tuur güng meis över'n Week, kunn avers ook, bi slech Wedder, lännger duurn.
Uns Fleeger, de Piper, wier 'n Dreesidder, föörn een för de Pilot, achtern de twe för mi un miene Utrüssung.
Fotografeert heff ik mit Hasselblad un Nikon, beid mit Motor.

Naa wi denn sonne Anlaag funnen hebbt, wier goornich lich, hett mien Pilot de sei ass son ollen Jagdfleeger anfloogen, ik ut de oppne Döör ierst mit de groote, doornaa, bi den tweeten Anfloog, mit de lütte Kamera Serienfoots schooten.

Övernacht hebbt wi in Gasthüüs inne Näch fun uns Lannesteeln. 

Fun de Films wurrn Kontaktabzüch maakt, doorfun hebbt de Möllner de Biller uusöcht, de fergröttert warrn schulln, je fiefuntwinnig Stück, teinmoolföfftein groot, as Reklaame kääm de inne Angeboots an de Gemein'.
Fotografeert eff ik ook uut'n Heevschruver. Too de Tied geef dat jo nok de DDR, un in soon fief Mieln breeden Streepen fun de Grenz dröff man nur mit denn Bunnesgrenzschutz fleegen.

De kääm uut de Näch fun Itzehoo na Blankensee, sammelten mi door up. Föör't Fotografeeren würr de Döör an miene Sied uutbuut, ik heff denn, mit'n Buukreem fassholln, knipst.

Wier 'n düüren Spoos, de kämen jo mit twee Pilotens un de Flugtied tellte fun un too eer Kasern. Een ganz anner Oort to Fleegen, rup un daal as mit'n  Foorstool, trüchwaarts un uppe Steel ook.